UJordaan ubhula udaba lukaTeboho Mokoena ngaphasi kwebhedi

Umongameli weSafa, uDanny Jordaan, ukhulume ngodaba lukaTeboho Mokoena, kwabangela intukuthelo kubalandeli.

Abalandeli bafuna iimpendulo ezinengi, baphinde bafune bona kube khona othathwa amagadango ngephutha elalicishe labiza iBafana Bafana indawo yayo eNdebeni yoMhlaba ezako ngonyaka ozako.

IBafana Bafana yadlala ngokungekho emthethweni noTeboho Mokoena ngesikhathi bekufanele bona angadlali umdlalo ophakathi kwabo neLesotho ngoMhlolanja.

Ngenxa yalokho, iFifa yakhuphula amaphuzu amathathu eqenjini, kwaphoqa bona iBafana ilwele indawo yayo kuze kube sekugcineni.

Iso loke labalandeli labekwa kuDanny Jordaan, umongameli onamandla weSafa, umuntu onelizwi lokugcina.

Kodwa nakakhuluma ngaludaba, uJordaan wakhulula lowo obekabhekene necala  okukholelwa bona bekunguVincent Tseka, umphathi weqembu.

“Imphakathi ifuna bona sihlale kuleyo ndaba,” kutjho yena. “Kodwana thina sesiya eNdebeni yoMhlaba.
“Leyo ndaba ivalekile. Asisanandaba nayo. Sesifinyelele lapho besifuna khona.”

Njengokungathi akukho okwenzekileyo udaba lufihlwe ngaphasi kwebhedi godu. UJordaan ushintshe iphepha.
“Asisoze sibuyisele emuva.

Okuphambi kwethu yiNdebe yeAfrika eMorocco kanye neNdebe yoMhlaba,” kwangeza yena.

“Umqeqeshi sele anitjelile,” uqhubekile, “sikhangele phambili ku-Afcon bese siya eNdebeni yoMhlaba.”

Njalo nje, udaba lukaTeboho Mokoena selufile. Aluxazululekanga. Aluchazwanga. Lubutjhelwe nje ngaphasi.

Amakhadi aphuzi, amaphuzu alahlekile, intukuthelo yabalandeli konke sekufihlwe ngaphasi kobukhazikhazi bokufinyelela eNdebeni yoMhlaba.

KuDanny Jordaan, umlayezo ucacile: Uphumelelo welapha koke.  Kanti labo abasakhuluma ngamakhadi aphuzi? Sebaphila esikhathini esidlulileko.