Isililo SikaCardoso Sinyakazisa iTshwane 🤧⚽️
Umqeqetshi weMamelodi Sundowns, uMiguel Cardoso, uveze ukunganeliseki kwakhe ngebala leLoftus Versfeld, wathi alikho ezingeni elidingekako ukuze iqembu lakhe lidlale ngebanga eliphezulu.
Lokhu ukhulume ngemva kokunqoba iSekhukhune United ngo-3-1 emdlalweni weBetway Premiership.
UCardoso uthe nanyana bathole amaphuzu amathathu, ibala belisesimeni esimbi khulu, ligcwele uthuli nodaka, okuthinte ikhwalithi yomdlalo.
Uthe abadlali bakhe bangenza ngcono khulu kodwana isimo sebala sibabambezela.
“Angazi bona niyayizwisisa na, kodwana ibala leli libi khulu, sibhadla odakeni,” kutjho yena.
Uthe ukudlala ngaphasi kweemeko ezinjalo kwehlisa amandla eqembu aze afike ngaphasi kwe-80% yamandla abo.
Uphinde wagcizelela bona iSundowns kumele ithole isisombululo esingapheliyo ngendawo yokudlalela imidlalo yekhaya.
Uthe akunakwenzeka ukuhlose ukunqoba iCAF Champions League ngebala elingekho ezingeni elifanele.
Uthe kulula ukudlala eFNB Stadium nanyana eMoses Mabhida eThekwini ngombana amabala lawo avumela ikhwalithi ephezulu.
UCardoso uphethe ngokuthi iqembu kumele liqine, limelane nobunzima, kodwana isisombululo siyaphuthuma.
Ngaphezu kwalokho, uCardoso uveze bona abadlali bakhe baphoqeleke ukutjhugulula indlela yabo yokudlala ngombana ibala belingavumeli ukudluliswa kwebhola ngokushelelako.
Uthe lokho kuthikameze isu labo lokuhlasela, kwenza kube budisi ukugcina ijubane nomfutho womdlalo njengokujayelekile.
