AmaBhakaniya Atshala Ithemba KuDe Jong
Umgadli omutsha weOrlando Pirates uAndre de Jong uthi ulethemba lokulingisa impumelelo eyake yatholwa ngumdlali wakibo uJeremy Brockie ngokuba ngumtshayi wamagoli ohlala etholakala eqenjini.
UDe Jong, oleminyaka engu-29, ujoyine amaBhakaniya phakathi kwesizini esuka kuStellenbosch FC njalo uveze ukuthi uyenelisa ukudlala njengomgadli ophansi loba endaweni yenombolo yetshumi.
Lumdlali weqembu lesizwe laseNew Zealand, osemele ilizwe lakhe emidlalweni engu-11 watshaya amagoli amabili wanika lama-assist amathathu, uthi ukujoyina iPirates kuzamnceda ekufezeni iphupho lakhe lokudlala kuNdebe yoMhlaba ka-2026.
UDe Jong uthe: “Okungenze ngathola isimo esihle eStellenbosch yisikhathi esinengi sokudlala kanye lokwesekwa engakuthola kubaqeqetshi.
Lokho kwanginceda kakhulu ngoba eAmaZulu ngangihlala ngilimele njalo ngingadlali isikhathi eside, kuthi eRoyal AM kwaba yisikhathi esifitshane.”
Uqhubeke wathi: “Ngakhuluma labanye abadlali baseNew Zealand abake badlala lapha njalo bangitshela okuhle ngeligi lelizwe.
Ngithemba ukulandela okwenziwa nguBrockie phambi kwamapali, loba ngingafinyelela ingxenye yalokho akwenzayo kungaba yimpumelelo enkulu kimi.”
UDe Jong usedlale imidlalo emibili ebhekene leMamelodi Sundowns kanye leCasric Stars, lapho iPirates eyehlulwe khona, kodwa uzimisele ukuqala ukutshaya amagoli masinyane.
Uthe usebenza nzima ekuzilolongeni nsuku zonke ukuze azuze ukwethembwa ngabaqeqetshi njalo ancede iPirates iphumelele emidlalweni ezayo.
