IBafana kumele ingathembele kuphela kubadlali beSundowns
UMarks Maponyane ukhuthaza abadlali bamaqembu angehlukeneyo bona bakhuphule izinga lemidlalo yabo ukuze bakghone ukufakwa kuBafana Bafana.
Uthi ngebanga lokuthi iMamelodi Sundowns idlala imidlalo eminengi kuPSL nakwiCAF Champions League, abadlali bayo bakhatheka ngebanga lokuthi baphinde babe ngumgogodla weBafana.
Lowo mdlali odlulilekhaya uthi amanye amaqembu kufanele asebenze nzima bona iBafana Bafana ikghone ukudlala kuhle kuCAF Africa Cup of Nations nakwiWorld Cup.
“Ukusebenza kuhle kweOrlando Pirates kwehlise umthwalo emahlombe wabagadli beMamelodi Sundowns,” kutjho uMaponyane.
“Ukufakwa kwabo kuBafana kwenze ithimba ladlala kuhle begodu bakghone ukusebenza ngokubambisana ekukhuliseni iBafana Bafana.”
Ngaphasi kukaHugo Broos, iqembu leBafana lakhiwe ngabadlali abavela emaqenjini ahlukahlukeneko — inqobo nje uma badlala kuhle kumaqembu abo.
Kodwana uBroos wake watholwa ngamacala okuthi ukhomba abanye abadlali kuphela abavela eSundowns nasePirates.
Kodwana uMarks Maponyane uthi akunjalo, begodu abalandeli kufanele basole amaqembu abo nawanga aboni abadlali bawo kuBafana Bafana.
“IKaizer Chiefs neStellenbosch FC kumele bazibambe kuhle kumidlalo yeCAF Confederation Cup,” kutjho uMaponyane aqhubeke.
“Ukudlala kuhle emidlalweni yeCAF kubapha abadlali amandla engqondo begodu kubajayelisa ezingeni lamazwe ngamazwe.”
Kuyathabisa kodwana ukuthi umncintiswano wezikhundla kuBafana uzokhula, ngoba abadlali bazokhuphisana bona bakghone ukufakwa eqenjini elizodlala kuAfcon naseWorld Cup.
“Abadlali manje bazaqala ukulwela izikhundla zabo kuBafana, njengombana bazabe sele bebona ithuba lokudlala kule midlalo emikhulu,” kuphetha uMaponyane.
