Iqhawe leChiefs, uSikhakhane, ukhuthaza abadlali ababolekiweko.
Iqhawe leKaizer Chiefs, uNtokozo Koloba Sikhakhane, ukhiphe umlayezo onzima kodwana okhuthazako kubadlali uSamuel Zwane noHappy Mashiane.
Basesebolekwe liqembu leSiwelewele FC, wabakhuthaza bona basebenzise lelithuba ngokugcwele ngebanga lokubuyela eNaturena.
“Ngicabanga ukuthi manje sekusezandleni zomdlali ngamunye nokuthi basebenza kangangani lapho eSiwelewele FC,” kutjho uSikhakhane kuLisenethini.
“Nangabe bazimisela, bangathola ithuba lokubuyela kuKaizer Chiefs, ngoba basesezinkontrotjini neklabhu.”
Ekhuluma ngokwenzekileko kuye ngesikhathi adlala khona, uSikhakhane ukhumbule isikhathi sakhe sokubolekwa.
“Ngangibolekwe yiKaizer Chiefs ngayodlala eDurban Stars, lapho engadlala khona kuNational First Division isizini yoke.
Ngemva kwalokho, ngalandela umqeqetshi wami ngaya kuDynamos FC, lapho engaba nomthelela omkhulu khona kanye noSandile ‘AK’ Ndlovu, naye obekabolekwe kuMamelodi Sundowns,” watjho.
“Ngemva kwesizini leyo, amaklabhu ethu asibuyisa ngoba abona ukuthi sesiqinile engqondweni — sesinawo umnqopho oqinile.
Kwadingeka ngilwe indawo neqhawe elinjengoJohn ‘Shoes’ Moshoeu ongasekho, uJabulani Mendu, noThabo ‘Tsikitsiki’ Mooki.
Umqeqetshi uTed Dumitru noBobby Motaung bangitshela ukuthi bafuna ukunqoba iligi,” kwangezelela uSikhakhane.
Uqinisekise uZwane noMashiane ukuthi mabagxile emsebenzini wabo futhi babheke isikhathi sabo sokubolekwa njengelivivinyo lokubuyela emaChiefs.
“Kufanele bangakhohlwa ukuthi iKaizer Chiefs ibathumele lapho bona badlale futhi benze kahle. Ngoba nawuhluleka lapho ubolekwe khona, uzakuhamba ungabe usabuyela eqenjini.”
Njengamanje, bobabili uZwane noMashiane basahluleka ukungena esiqalweni semidlalo yeSiwelewele FC — okusikhomba ngokusobala isexwayiso esinikelwe nguSikhakhane.
