AMAZULU NETHUBA KU-CAF CONFEDERATION CUP
AMAZULU ayaqhubeka nokuziphendlela indlela eya emidlalwenI yeCaf Confederations Cup ngesizini ezayo. Lokhu kubonakale izolo ibukisa ngeChippa United eyibhaxaBula ngo 5-1 emidlalweni weBetway Premiership eMoses Mabhida Stadium eThekwini.
Lomphumela uwagcine kuyo indawo yesine namaphuzu angu-42 ngemuva kwemidlalo engu-26. Zimbili izikhala ezibekelwe amaqembu akuleli okumele abambe iqhaza kulomqhudelwano.
Kuba yiqembu elizoqeda endaweni yesithathu kwi-log kuthi elinye kube yileli elisuke linqobe iNedbank Cup. Ngenyanga ezayo iDurban City neTS Galaxy yibo abazotholana phezulu kowamanqamu weNedbank Cup.
Indawo esele manje ngeyaleliqembu elizoqeda endaweni yesithathu kanti okwamanje kusayiKazier Chiefs esaqhoqhobele kuyo. Nalo Usuthu lusenalo ithuba lokuwagudluza Amakhosi kulendawo yize okwamanje kubukeka kuwunqansa.
AmaZulu asele ngemuva ngamaphuzu amane kwiChiefs kanti futhi aphambili ngemidlalo emibili. Nokho ibhola liyagingqika futhi ukuthi Amakhosi afumbethe imidlalo emibili akuchazi ukuthi amaphuzu aleyo midlalo aqinisekisiwe engakayidlali.
Ngalokho AmaZulu, aqeqeshwa ngu-Arthur Zwane, kungamele aqhubeke nomsebenzi omuhle awubonise izolo – kusengenzeka nomayini ngaphambi kokuphothulwa kwesizini.
Ibhola elikhonjiswe ezikaZwane eMoses Mabhida Stadium, zibonisile ukuthi zimisele ukulwa kuze kuyovalwa. IChippa yiyo eshaye igoli kuqala ngasekupheleni kwesiwombe sokuqala.
Kodwa kuthe kuyiwa ekhefini AmaZulu abesehamba phambili ngo 2-1. Esiwombeni sesibili angeze amanye amagoli amathathu nokwenze kwaba ngumphumela omkhulu kuwo esake yawuthola kulesizini okwamanje.
IChippa ngakolunye uhlangothi isale izikhotha amanxeba kanti ayikaphumi egcupheni yokugawulwa yizembe noma iphinde idlale kulama-playoff. Leli qembu lase-Gqeberha lihlezi endaweni yeshumi nantathu (13) namaphuzu angu-24 emidlalweni engu-26.
Okwamanje amaphuzu amathathu ahlukanise IChippa neMarumo Gallants esendaweni yeshumi nesine (14). IMagesi FC, eku-15, ne-Orbit College, eku-16, bona basele ngemuva ngamaphuzu amane kwiChippa.
